لاہور: پاکستان کرکٹ ٹیم کی سلیکشن کمیٹی کے رکن عاقب جاوید نے لاہور میں ہونے والی پریس کانفرنس میں کئی اہم انکشافات کیے۔ انہوں نے تصدیق کی کہ سابق کپتان بابر اعظم اور اوپنر فخر زمان انجری کے باعث بنگلہ دیش کے خلاف آنے والی ون ڈے سیریز میں شامل نہیں ہوں گے۔
عاقب جاوید نے کہا: “بابر اعظم انجری کا شکار ہیں، اسی وجہ سے وہ سیریز کا حصہ نہیں بن سکے۔ فخر زمان بھی فٹ نہیں ہیں۔ ہم تحقیقات کرائیں گے کہ ورلڈ کپ ختم ہوتے ہی یہ دونوں اہم کھلاڑی کیسے انجری کا شکار ہو گئے۔ یہ جاننا ضروری ہے کہ کیا وہ ٹورنامنٹ کے دوران ہی زخمی ہوئے تھے یا نہیں؟”
ورلڈ کپ کی کارکردگی پر بات
عاقب نے ٹی ٹوئنٹی ورلڈ کپ 2026 کی کارکردگی کا جائزہ لیتے ہوئے کہا کہ ٹیم سے بہت بڑی امیدیں تھیں مگر کارکردگی ویسی نہ رہی جیسا ہونا چاہیے تھا۔ “بھارت کے خلاف ریکارڈ 8-0 ہے، اس میں سب شامل ہیں۔ لیکن اگر بھارت والا میچ الگ کر دیں تو باقی آپ صرف ایک میچ ہارے ہیں۔ ایک میچ بارش میں ضائع ہو گیا اور سیمی فائنل میں باہر ہو گئے، پھر لوگوں نے تنقید شروع کر دی کہ سب ختم ہو گیا، یہ بدل دو وہ بدل دو۔”
پلیئنگ الیون کا فیصلہ کس کا؟
انہوں نے واضح کیا کہ پلیئنگ الیون بنانا کوچ اور کپتان کی ذمہ داری ہے۔ “ہمارا کوئی شوق نہیں کہ ہم بیٹھ کر 11 کھلاڑی منتخب کریں۔ گراؤنڈ میں جو لڑائی لڑنی ہوتی ہے، وہی بہتر جانتے ہیں کہ کون کھیلے گا اور کیوں نہیں کھیلا۔ یہ آزادی کوچ اور کپتان کو ہونی چاہیے۔”
تبدیلیوں اور ڈویلپمنٹ کا معاملہ
عاقب جاوید نے کہا کہ پاکستان نے ہر ہار کے بعد سب سے زیادہ تبدیلیاں کی ہیں، مگر 2009 کے بعد ڈویلپمنٹ ویسی نہیں ہو سکی جیسا ہونا چاہیے تھا۔ “ہر ایونٹ کے بعد لوگ کہتے ہیں چیئرمین بدل دو، سلیکٹرز بدل دو، کپتان بدل دو۔ ہمارا بس یہی ہوتا ہے کہ ہار ہوئی تو سب کو نکال دو۔”
دیگر سلیکٹرز کا موقف
سرفراز احمد نے وکٹ کیپرز کے بارے میں بتایا کہ پائپ لائن میں 3-4 اچھے آپشنز ہیں، جن میں حسیب اللہ، روحیل نذیر اور غازی غوری شامل ہیں۔ غازی کی حالیہ فارم بہت اچھی رہی ہے۔
مصباح الحق نے کہا کہ “ہم دیکھتے ہیں کہ ٹیم کو کس کھلاڑی کی ضرورت ہے۔ کپتانی میں غلطیاں ہوئیں مگر یہ کھیل کا حصہ ہیں۔”
عاقب جاوید نے یہ بھی بتایا کہ کوچ جیسن گلیسپی نے 15 رکنی ٹیم میں تبدیلی نہ کرنے کا کہا تھا، اس لیے کمیٹی نے 20 کھلاڑیوں کا نام دیا تاکہ کمبی نیشن کے لیے آپشنز زیادہ ہوں۔
فخر زمان کی ہیمسٹرنگ انجری اور بابر کی فنگر انجری کی تفصیلات ابھی سامنے آ رہی ہیں، اور فینز اب انتظار کر رہے ہیں کہ تحقیقات کیا نتیجہ دیتی ہیں۔ پاکستان کرکٹ ایک بار پھر تنقید اور بحث کے مرکز میں ہے۔
Leave a Reply