اسلام اآباد( خصوصی رپورٹ) ورلڈ کپ کوالیفائرز کے سنسنی خیز سیمی فائنل میں جاپان کو 3-4 سے شکست دے کر پاکستان نے آٹھ سال بعد 2026 کے ہاکی ورلڈ کپ کے لیے کوالیفائی کر لیا تفصیلات کے مطابق مصر میں جاری ہاکی ورلڈ کپ کوالیفائر کے سنسنی خیز سیمی فائنل میں پاکستان نے جاپان کو 3-4 سے شکست دے کر 2026 کے ہاکی ورلڈ کپ کے لیے کوالیفائی کر لیا اور یوں آٹھ برس بعد عالمی ایونٹ میں واپسی یقینی بنا لی۔ گرین شرٹس نے انتہائی سخت اور تیز رفتار مقابلے میں شاندار کم بیک کرتے ہوئے کامیابی سمیٹی اور باوقار ٹورنامنٹ کے لیے اپنی نشست پکی کر لی۔ پاکستان نے میچ کا آغاز جارحانہ انداز میں کیا اور نویں منٹ میں محمد عماد کے گول کی بدولت برتری حاصل کر لی۔ تاہم جاپان نے 21ویں منٹ میں گول کر کے مقابلہ برابر کر دیا۔اس کے بعد جاپانی ٹیم نے کھیل پر گرفت مضبوط کرتے ہوئے 35ویں اور 41ویں منٹ میں مزید دو گول اسکور کر کے پاکستان کے خلاف 1-3 کی واضح برتری حاصل کر لی۔ دو گول کے خسارے کا سامنا ہونے پر پاکستان نے آخری کوارٹر میں ڈرامائی واپسی کی۔ ابو محمد نے 52ویں منٹ میں گول کر کے خسارہ کم کیا، جبکہ 55ویں منٹ میں سفیان خان نے گول کر کے اسکور 3-3 سے برابر کر دیا۔ کچھ ہی دیر بعد 57ویں منٹ میں افراز نے فیصلہ کن گول کر کے پاکستان کو 3-4 کی برتری دلا دی اور یوں ٹیم نے شاندار کم بیک مکمل کیا۔اختتامی لمحات میں جاپان نے بھرپور دباؤ ڈالا، تاہم پاکستان کے گول کیپر علی رضا نے پنالٹی اسٹروک روک کر اہم بچاؤ کیا اور اپنی ٹیم کی فتح یقینی بنا دی۔اس کامیابی کے ساتھ پاکستان نے آٹھ سال بعد پہلی مرتبہ ہاکی ورلڈ کپ کے لیے کوالیفائی کر لیا، جسے ملک کے قومی کھیل کے لیے اہم پیش رفت قرار دیا جا رہا ہے۔ پاکستان ہاکی فیڈریشن (پی ایچ ایف) کے صدر محی الدین وانی اور پاکستان اسپورٹس بورڈ کے ڈائریکٹر جنرل یاسر پیرزادہ نے ورلڈ کپ کے لیے کوالیفائی کرنے پر قومی ٹیم کو مبارک باد دی۔ پی ایچ ایف کے صدر وانی نے اعصاب شکن مقابلے میں شاندار کارکردگی پر کھلاڑیوں کو سراہا۔ دوسری جانب اولمپئن اصلاح الدین صدیقی، حسن سردار اور سمیع اللہ خان نے بھی ٹیم کی کامیابی پر خوشی کا اظہار کرتے ہوئے نیک تمناؤں کا اظہار کیا۔
